Laura

de vulpe et hirco

laura-gibbs@ou.edu — Thu, 04 Sep 2003 03:38:18 GMT

For notes and a reading quiz, go to aesopica.net.

Homines consilio prediti prius finem prospiciunt, quam dant operam rebus gerendis. De hoc audi fabulam.
Vulpes et hircus sitientes in quendam puteum ut sitim extinguerent descenderunt, verum enim post potum, cum egressum circumspiceret hircus, vulpes ei comiter ait: Bono sis animo, nam quid saluti nostre opus sit, probe animadverti. Si enim rectus stabis et pedibus anterioribus cornibusve muro adherebis, tuas ergo scapulas cornuaque conscendens exibo. Cumque egressa fuero te manu comprehendens hinc desuper traham; huic caper prompte deservivit. Vulpes suo exultans egressu circa os putei hirco alludebat. At dum caper illam incusat, sibi pacta haud servasse, ei facete vulpecula inquit: Si ea, caper, sapientia preditus esses, quo pilorum ornatu istec tua barba referta est, non prius in puteum descendisses, quam egressum pensiculate vidisses.
Significat ergo fabula, quod prudentes prius finem rei prospiciunt, quam opus inierint.

Syndicate this content:

Play the game at QUIA!

de aquila et scrabone

laura-gibbs@ou.edu — Wed, 03 Sep 2003 04:38:57 GMT

For notes and a reading quiz, go to aesopica.net.

Aquila leporem persequebatur, at lepus auxilii inops, quem tempus obtulit, scabronem videns ab eo auxilium imploravit. Cui scabro pollicitus est tutelam et custodiem suam. Deinde cum aquilam propinquantem scabro conspicatur, eam precatur, ne suum sibi eripiat servum. At aquila, scabronis parvitatem contemnens eo coram leporem exedit. Verum scabro sue iniurie memor, ubi aquila nidificaret observat. Ecce aquila ova parit, scabro alis clarus ad aquile nidum volat atque ova devolvens humi deiecit. Aquila iacture ovorum merore concita, evolat ad Iovem (est enim ales deo illi sacrata) ac locum ad pariendum sibi tutum dari precatur. Iupiter sibi concedit, ut cum tempus adest, eius in sinu pariat ova. Hoc scabro providens, globum e stercore conficit atque sursum evolans in Iovis sinum demittit. Iupiter volens e sinu globum excutere, ova aquile simul excussit. Extunc aiunt, aquilam numquam parere quo tempore scabrones existunt.
Fabula significat, quod nullus porro est contemnendus, quoniam nemo est, qui iniuriam accipiat, quin cum tempus datur se ulcisci non queat.

Syndicate this content:

Play the game at QUIA!

de aquila et corvo

laura-gibbs@ou.edu — Mon, 01 Sep 2003 06:06:53 GMT

For notes and a reading quiz, go to aesopica.net.

Aquila celsa ex rupe evolans, agnum ex omni grege arripuit, quam rem cum corvus conspicatur emulatione motus vehementi cum crepitu ac stridore devolat in arietem, atque ungues in arietis vellus ita implicat, quod inde etiam motu alarum se explicare non potest; hunc pastor cum ita implicitum videt, accurrens corvum comprehendit atque alarum pennis incisis pueris suis pro ludibrio dedit.
Verum enim cum quispiam corvum rogaret, que nam volucris esset, corvus ait: Prius equidem quoad animum aquila fui, nunc vero me corvum esse certo cognosco.
Fabula significat, quod qui supra vires quippiam audet, hoc solum efficit, quod in adversa sepius incidit ac se vulgo ridiculum exhibet.

Syndicate this content:

Play the game at QUIA!

de ciconia et serpente

laura-gibbs@ou.edu — Sun, 24 Aug 2003 21:20:28 GMT

For notes and a reading quiz, go to aesopica.net.

Ciconia uenit ad foramen Serpentis, et uocauit eum ut exiret. Respondit Serpens: Quis es tu, qui ausus es me infestare? Et ait: Ego sum Ciconia, et libenter tecum contenderem. Et ait Serpens: Misera, cum graciles habeas tibias et fragiles, collum gracile et longum, quomodo mecum pugnares, quoniam uici strenuissimum animal, scilicet Adam, primum hominem a Deo plasmatum, et uxorem eius, et multos homines in deserto peremi? Centum tales Ciconie non possent unicum hominem expugnare. Quomodo presumis mecum contendere? Et ait Ciconia: Tantum exeas foramen et uidebis. Serpens iratus, sibilans et os aperiens, foramen exiuit, quasi uellet Ciconiam totam deuorare. Ciconia statim dedit ei cum rostro super capud, et Serpens statim occubuit, dicens: Ecce iam me peremisti.
Ait Ciconia: Certe, si Adam et ceteri homines scirent ubi est uita tua et fortitudo, et hoc artificio usi essent, te in capite percussissent, nunquam a te uicti fuissent. Tali igitur arte utendum est.

Syndicate this content:

Play the game at QUIA!

de capra et lupo

laura-gibbs@ou.edu — Wed, 20 Aug 2003 06:46:32 GMT

For notes and a reading quiz AND AN AUDIO VERSION, go to aesopica.net.

Capra, dum esset in pascuis inter rubos, Lupum forte obvium habuit. Quid hic agis, inquit Lupus, inter opaca nemora? Capra respondit : A facie vestra, domine mi, diu longeque diffugi; sed ecce nunc sponte vobis occurro, et queso ut mecum misericordiam agatis. Cui Lupus ait : Et ego te undique quesivi et bene iam te in meis pascuis inveni, et misericordiam tecum faciam quam volueris; sed vitam de cetero habere non poteris. Vitam, inquit Capra, non peto; sed rogo ut vivendi spacium michi concedas, donec duas missas decantem, unam pro me et alteram pro te. Concedo, inquit Lupus, quod rogas. Et ait Capra : Ducite ergo me in eminentem hunc locum, ut, cum Superis vicinior fuero, ipsi me melius audiant cantantem et orantem; et Capre silvestres et domestice, cum me audierint, ipse devote reddite, pro me et pro vobis orabunt. Factumque est, ut rogavit. Constituta igitur in eminenti loco, respiciens in celum, cepit alta voce clamare, et Lupus astitit ei, credens quod missam cantaret. Audierunt clamorem Capelle vicini; canes et rustici, egressi de villis, Lupum insecuti sunt, et comprehenderunt eum, et fustibus impie ceciderunt, et Capram de morsibus liberaverunt suis. Qui, dum traheretur et cederetur, conversus ad Capram dixit : Heu! Me infelicem, quia, ut video, pro me minus, pro te autem optime orasti. Et ait Capra : Sufficere michi debet, quod oraciones mee pro me sola exaudite sint.
Moralitas. Sic multi, cum aliena negocia se tractare promittunt, pro suis magis solliciti sunt, et propriis utilitatibus insistunt.

Syndicate this content:

Play the game at QUIA!

haedus et lupus

laura-gibbs@ou.edu — Sat, 16 Aug 2003 04:54:47 GMT

For notes and a reading quiz, go to aesopica.net.

Capella cum esset foeta, et partum uellet custodire, ignarum Haedum, ne aperiret ostium monuit, sciens quod multae ferae stabula pecorum circuirent. Monuit, et abiit exinde. Venit Lupus uocem assimilans matris. Haedus, ut uocem audiuit, ait : Vocem matris audio; sed tu fallax et inimicus es, et sub matris uoce nostrum quaeris sanguinem bibere et carnes edere.
Quia praecepta parentum audire laus est.

Syndicate this content:

Play the game at QUIA!

de mustela et muribus

laura-gibbs@ou.edu — Fri, 15 Aug 2003 05:10:49 GMT

For notes and a reading quiz, go to aesopica.net.

Mustela, inveterata nec iam amplius Mures venari prevalens, arte iuvari voluit, ut vitam habere posset. Igitur in farina se coniecit et abscondit, ubi Murium frequenciam esse scivit. Ibi ergo in insidiis lacitans, Mures sine labore capiendos exspectavit. Cepit itaque tres iuvenes et minus cautos Mures.
Tandem venit grandevus Mus et circumspectus, qui de laqueis et muscipulis non semel evaserat, vidensque illam insidias habentem, cognita fraude eius, sic eam allocuta est : Minus cautos Mures decipere quidem potesti; sed me minime capietis. Ego enim vos intus et in cute novi.
Moralitas. Ars valet et ingenium. Sepe namque arte profictur quod viribus posse fieri non invenitur.

Syndicate this content:

Play the game at QUIA!

De leone et apro et tauro et asello.

laura-gibbs@ou.edu — Thu, 14 Aug 2003 04:10:50 GMT

For notes and a reading quiz, go to aesopica.net.

Irretit miserum gravitas annosa leonem,
  Inglaciat corpus corque senile gelu.
Instat aper, pensat veteri pro vulnere vulnus;
  Frontis eum telo taurus utroque fodit;
Sevit asellus iners et frontem calce sigillat.
  Hec solo gemitu vindicat acta leo:
"Omnia que vici, me vincunt omnia. Dormit
  Vis mea, dormit honor, dormit honoris opus.
Cui nocui, nocet ille mihi, multisque peperci,
  Que mihi non parcunt, pro pietate nocent."
Hunc timeat casum qui se non fulcit amico,
  Nec dare vult felix, quam miser optat, opem.

Syndicate this content:

Play the game at QUIA!

vacca et ovis et capella et leo

laura-gibbs@ou.edu — Wed, 13 Aug 2003 04:52:04 GMT

For notes and a reading quiz, go to aesopica.net.

Numquam est fidelis cum potente societas.
Testatur haec fabella propositum meum.
Vacca et capella et patiens ovis iniuriae
socii fuere cum leone in saltibus.
Hi cum cepissent cervum vasti corporis,
sic est locutus partibus factis leo:
'Ego primam tollo nomine hoc quia rex cluo;
secundam, quia sum consors, tribuetis mihi;
tum, quia plus valeo, me sequetur tertia;
malo adficietur si quis quartam tetigerit'.
Sic totam praedam sola improbitas abstulit.

Syndicate this content:

Play the game at QUIA!

vacca, ovis, capella et leo

laura-gibbs@ou.edu — Wed, 13 Aug 2003 04:32:17 GMT

For notes and a reading quiz, go to aesopica.net.

Vacca, Ouis et Capella obuiam fuerunt cum Leone in saltibus. Hi cum cepissent uasti corporis ceruum, factis partibus, sic est locutus Leo : Ego primam tollo partem, quia nominor Leo. Secundam, quia sum fortis. Tertiam, quia omnibus uobis magis ualeo. Quartam qui titigerit, male patietur. Sicque totam praedam sua improbitas defendit.
Nunquam fidelis cum potente societas sit copulanda.

Syndicate this content:

Play the game at QUIA!

vacatio!

laura-gibbs@ou.edu — Wed, 06 Aug 2003 04:05:36 GMT

I will be on vacation for a few days, but there are daily fables available at the website for the time I am gone: aesopica.net.

de caseo et rato et cato

laura-gibbs@ou.edu — Tue, 05 Aug 2003 03:12:56 GMT

For notes and a reading quiz, go to aesopica.net.

Contra prelatos aggrauantes inferiores.
Quidam habuit Caseum in archa, et uenit Ratus. Incepit eum rodere. Cogitauit paterfamilias quid faceret. Tandem habito consilio, posuit intus Murilegum, et ille deuorauit Ratum et Caseum.
Sic plerique episcopi ponunt aliquam parochiam in custodia capellani qui deuorat parochiam. Tandem ponit archidiaconum qui deuorat parochiam et capellanum, hoc est caseum et ratum.

Syndicate this content:

Play the game at QUIA!

de leone et lupo et vulpe

laura-gibbs@ou.edu — Mon, 04 Aug 2003 02:45:44 GMT

For notes and a reading quiz, go to aesopica.net.

Mures habuerunt semel consilium qualiter se a Gato possent premunire. Et ait quidam Mus sapiens: Ligetur campanella in collo Cati, et tunc poterimus ipsum quocumque perrexerit audire et insidias eius precauere. Placuit omnibus hoc consilium.
Et ait Mus unus: Quis ligabit campanellam in collo Cati? Respondit Mus unus: Certo non ego. Respondit alius: Nec ego pro toto mundo ei uellem tantum appropinquare.
Sic plerumque contingit quod clerici, monachi insurgunt contra episcopum, priorem, uel abbatem, dicentes: Vtinam esset talis amotus, et alium episcopum uel abbatem haberemus! Et hoc placeret omnibus. Tandem dicunt: Quis opponit se contra episcopum? Quis accusabit eum? Alii sibi timentes dicunt: Non ego, nec ego. Et sic minores permittunt maiores uiuere et preesse.

Syndicate this content:

Play the game at QUIA!

laura-gibbs@ou.edu — Sun, 03 Aug 2003 04:07:19 GMT

For notes and a reading quiz, go to aesopica.net.

Leo obdormivit forte in nemore; ad quem Mures accedentes circa eum cursitabant. Contigit autem ut Mus, super eum saliens, sompnum ipsius turbaret. Leo igitur excitatus in iram versus est, sepeque excuciens Murem apprehendit. Cui Mus ait : Ut nobilitas tua michi parcat misero, paratus sum iusiurandum tibi facere, quod non ex studio meo hoc contigerit, sed per magnum infortunium meum. Peciitque misericordiam et vitam. Visum est ergo Leoni tenuem fore gloriam, si Murem dampnaret, et misericordia motus dimisit eum illesum.
Factum est autem statim postea, ut Leo in foveam caderet, que ad capiendas feras parata erat. Impeditus ergo ibi, Leo rugitus dedit et strepitus. Quibus auditis, Mus, qui in vicino fuit, curiositatis causa illuc venit, vidensque Leonem in fovea trepidantem agnovit eum, et ait illi : Video quod desolatus sis et in magno periculo constitutus, moveorque super te pro eo quod nuper benigne mecum egisti. Nunc ergo, cum vires non habeam, volo te iuvare consilio. Sic ergo facies : terram ungulis tuis effossam in cumulum trahes, et de cumulo saliendo lacum superare poteris. Fecit itaque Leo sicut Mus docuit, et, adiutus cumulo, facili se saltu liberavit.
Moralitas. Sic dives et potens pauperis debet misereri et offensam suam illi dimittere, quia pauper poterit diviti necessarius esse.

Syndicate this content:

Play the game at QUIA!

leo et mus

laura-gibbs@ou.edu — Sat, 02 Aug 2003 04:13:51 GMT

For notes and a reading quiz, go to aesopica.net.

Dormiente Leone in silua Mures agrarii ludentes, unus ex eis super Leonem non uoluntate transiit. Experrectus Leo celeri manu miserum Murem apprehendit. Ille rogabat ueniam sibi dari, quia non uoluntate fecerat. Leo cogitabat, si occideret, crimen esset, et non gloria. Ignouit, et dimisit.
Post paucos dies Leo in foueam cecidit; captus mugire coepit. Mus, ut audiuit, cucurrit. Ubi captum cognouit, ait: Non sum immemor beneficii tui. Tunc illius ligaturas lustrare coepit, neruos secare, et laxare illius artis ingenia. Sic Mus Leonem captum liberum siluis restituit.
Ne quis minimos laedere praesumat.

Syndicate this content:

Play the game at QUIA!

de mure qui voluit matrimonium contrahere

laura-gibbs@ou.edu — Fri, 01 Aug 2003 04:53:45 GMT

For notes and a reading quiz, go to aesopica.net.

Contra illos qui superbe agunt, alta cogitantes et sapientes et cetera.
Mus semel uoluit matrimonium contrahere et cogitauit quod maritum acciperet fortissimum; et cogitauit penes se quid esset strenuissimum. Tandem uidebatur sibi quod Ventus, quia prosternit cedros, turres, domos. Misit nuncios Vento quod esset maritus eius. Dixit Ventus: Quare uult mecum contrahere? Dixerunt nuncii: Quia inter omnes creaturas es fortissima. Respondit Ventus: Immo castrum Narbonense forcius est me, quia iam plus quam per mille annos stetit aduersum me et scindit et confringit uires meas, et nunquam potui eum prosternere. Reuersi sunt nuncii et retulerunt responsum, et dixit Mus: Ex quo forcior est Turris, volo quod sit maritus meus. Significabat hoc Turri, et ait Turris: Quare uult mecum contrahere? Et responsum: Quia res es fortissima et forcior Vento. Et ait Turris: Certe Mures sunt forciores me, quia tota die me perforant et frangunt, et faciunt uiam per me. Et ita, habito consilio, oportebat quod Mus Murem sibi associaret.

Syndicate this content:

Play the game at QUIA!

de mure et catto

laura-gibbs@ou.edu — Wed, 30 Jul 2003 04:59:19 GMT

For notes and a reading quiz, go to aesopica.net.

Contra non implentes uotum.
Mus semel cecidit in spumam uini uel ceruisie, quando bulliuit. Catus transiens audiuit Murem pipantem eo quod exire non potuit. Et ait Catus: Quare clamas? Respondit: Quia exire non ualeo. Ait Catus: Quid dabis mihi, si te extraxero? Ait Mus: Quicquid postulaueris? Et ait Catus: Si te hac uice liberauero, uenies ad me cum te uocauero? Et ait Mus: Firmiter hoc promitto. Ait Catus: Iura mihi. Et Mus iurauit. Catus Murem extraxit et ire permisit. Semel Catus esuriuit et uenit ad foramen Muris, et dixit ei quod ad ipsum exiret. Dixit Mus: Non faciam. Ait Catus: Nonne iurasti mihi? Dixit: Frater, ebria fui, quando iuraui.
Sic plerique, quando infirmi uel in carcere uel in periculo, proponunt et promittunt uitam emendare, ieiunare uel huiusmodi. Sed cum periculum euaserunt, uotum implere non curant, dicentes: In periculo fui et ideo non teneor.

Syndicate this content:

Play the game at QUIA!

de ape et scrabone (Odo 32)

laura-gibbs@ou.edu — Sat, 26 Jul 2003 04:40:45 GMT

For notes and a reading quiz, go to aesopica.net.

Apes semel inuitauerunt Scrabones ad prandium. Venerunt Scrabones, et mensa posita apposuerunt Apes mel et fauum. Scrabones parum comederunt et auolauerunt. Iterum Scrabones inuitauerunt Apes; mensa posita apposuerunt Apibus fimum boum. Apes noluerunt gustare et recesserunt.
Apes sunt doctores ecclesie, uiri contemplatiui, qui inuitant impios et apponunt fauum mellis, id est precepta domini et legem ipsius, que sunt dulciora super mel et fauum. Sed impii parum uel nichil gustant, et, si aliquem inuitant impii, stercora boum, id est uerba immunda uel opera, ebrietates, gulositates apponunt, ita quod iusti quandoque corrumpuntur, quoniam corrumpunt bonos mores colloquia praua.

Syndicate this content:

Play the game at QUIA!

de equo et leone (Rom. Ang. 26)

laura-gibbs@ou.edu — Fri, 25 Jul 2003 03:27:31 GMT

For notes and a reading quiz, go to aesopica.net.

Equus stetit in pascuis, et ecce Leo, prede cupidus, ex improviso supervenit; quem ut quadrupes vidit, gravi percussus est metu, et ait intra se: Angustie michi sunt undique, et quid eligendum sit ignoro. Leoni enim resistere minus tutum est michi, et terga dare multum est periculosum. Scio ergo quid michi sit utilius: Leo nobilis est et misericors et pius, et ipse simulato languori subvenire non dubitabit.
Cepit igitur hinnire et terram calcibus pulsare et miserum statum simulare. Quod ut Leo vidit, paulatim accessit, et tanti laboris causam inquesivit. Cui dixisse creditur Equus: Dum ego miser hic ad pascua mea deambularem, grandis et preacuta spina posteriorem pedem meum transfixit, et adhuc in recenti vulnere consistit. Que, si eiecta non fuerit, vel michi mortem faciet vel pedis tollet officium.
Leo ergo, solita pietate motus, Equo conpassus est, et eum consolari cepit et salutem ei promittere quam ipse prestare posset. Flexis itaque genibus ad pedem se inclinavit, ut causam laboris videat et curam adhibeat; sed fallax Equus ad salutem utrisque calcibus pii Leonis frontem impie conquassavit, ipsoque prostrato aura velocius aufugit.
Leo vero, in extasi factus, post longam moram caput erexit ad Equum circumspiciens; ipso non invento sic locutus est: Frons mea testatur me nimis fuisse pium, cum volui iuvare perversum.
Moralitas. Nullus ergo debet perversi misereri vel iniquum fovere, quia, quanto plus fovebitur, tanto adversior invenitur.

Syndicate this content:

Play the game at QUIA!

De cervo et ove (Rom. Ang. 112)

laura-gibbs@ou.edu — Thu, 24 Jul 2003 04:41:41 GMT

For notes and a reading quiz, go to aesopica.net.

Cervus ab Ove modium frumenti peciit, quod se ei commodasse dixit, Lupum in testimonium secum adducens. Ovis, talibus auditis, perterrita maxime propter Lupi presenciam, diem rogavit sibi dari, in quo hec persolvere posset; quod et factum est.
Die igitur statuto reversus est Cervus solus, sperans se recepturum quod petierat. Ovis vero, de Lupi gaudens absencia, eum sprevit et ait: Nimia in vobis est decepcio; habete vobis campos ad fugiendum et Lupus nemus ad lacitandum.
</i>Moralitas. Dives, cum pauperi aliquid commodavit, ut plus ab eo exigere queat, perversorum se testimoniis roborat; sed sepe simplicitas pauperis defenditur, ubi divitis perversa dolositas confunditur.</i>

Syndicate this content:

Play the game at QUIA!

laura-gibbs@ou.edu — Wed, 23 Jul 2003 04:54:32 GMT

For notes and a reading quiz, go to aesopica.net.

Canis calumpniosus dixit ad Ouem: Debes mihi reddere panem, quem dederam mutuo. Contendebant autem. Ouis autem dicebat nunquam ab illo panem se accepisse. Cum ante iudicem uenissent, Canis dixisse fertur habere testes.
Introductus Lupus ait: Scio panem Canis commodatum Oui.
Introductus Miluus dixit: Me coram accepit.
Accipiter introiens ait: Negas tu quod accepisti?
Victa Ouis a tribus falsis testibus, artius exigitur; coacta uero extractam lanam suam uendidit, ut quod non acceperat redderet.
Qui seditiose innocentes laniant et opprimunt.

Syndicate this content:

Play the game at QUIA!

De lupo et agno (Rom. Ang. 2)

laura-gibbs@ou.edu — Tue, 22 Jul 2003 04:41:49 GMT

For notes and a reading quiz, go to aesopica.net.

Lupus et Agnus simul de rivo biberunt; sed Lupus erat in parte superiori et Agnus in inferiori.
Lupus itaque, cum haustum fecerat, erexit se et dixit ad Agnum: Tu qui lanam in decepcione portas, semper meis offensis insistis.
Agnus vero, ad hanc vocem trepidus, timide respondit et humiliter: Domine potens et tremende, quare tam aspere michi loqueris innocenti? Quas enim offensas possem parvulus ego tibi inferre?
Et Lupus ait: Tu turbas aquam, quod inde gustare non possum.
Responditque Agnus: Mira sunt que dicis; quia, cum tu sis superius et ego inferius, quomodo possum tibi aquam turbare? Sed occasionem adversum me queris, sicut qui vult ab amico recedere.
Tunc ergo exasperatus Lupus ait iterum : Tu nimis es garrulus et iurgia mecum multiplicare presumis, sicut pater tuus, qui, nondum transactis sex mensibus, de eodem in hoc loco michi servivit, quod in te merito redundabit.
Et ait miser Agnus: Cur sic in me illas patris culpas refundis, qui nondum natus eram?
Tunc raptor ait : Sic michi respondes in omnibus, et reclamare non cessas?
Irruensque in eum, guttur eius crudeliter apprehendit et finem fecit verborum.
Sic tyranni faciunt: cum innocentum res vel mortem cupiunt, sive iuste sive iniuste eos spoliant et opprimunt.

Syndicate this content:

Play the game at QUIA!

De lupo et agno bibentibus (Odo 24)

laura-gibbs@ou.edu — Mon, 21 Jul 2003 04:31:10 GMT

For notes and a reading quiz, go to aesopica.net.

Contra opprimentes pauperes.
Lupus et Agnus biberunt de eodem riuulo, et ait Lupus: Quare turbas aquam meam? Et ait Agnus: Non turbo, quia uos bibitis superos, et aqua fluit de uobis ad me. Et ait Lupus: Maledicte, contradicis mihi, et es ita audax? Et statim deuorauit Agnum.
Ita diuites pro nulla causa, qualitercumque respondeant pauperes, ipsos deuorant.

Syndicate this content:

Play the game at QUIA!

de asinis indutis pellibus leoninis (Odo 26)

laura-gibbs@ou.edu — Sat, 19 Jul 2003 04:22:59 GMT

For notes and a reading quiz, go to aesopica.net.

Contra pigros. Asini uiderunt quod homines male et dure tractauerunt eos, stimulando, onera imponendo. Viderunt etiam quod timuerunt Leones. Condixerunt ad inuicem quod acciperent pelles leoninas, et sic homines timerent illos.
Fecerunt sic. Asini igitur, induti pellibus leoninis, saltabant, discurrebant. Homines fugerunt credentes esse Leones. Tandem Asini inceperunt recanare. Homines diligenter auscultauerunt et dixerunt: Vox ista vox Asinorum est; accedamus propius.
Accesserunt tandem; viderunt caudas illorum et pedes et dixerunt: Certe isti sunt Asini, non Leones, et ceperunt Asinos et multum bene uerberauerunt.
Ita asini sunt homines falsi, pigri ad omne bonum. Postea, ut reuerentia eis tribuatur, assumunt habitum Benedicti; sed multociens emittunt uoces asininas, quando scilicet de luxuria, de pecunia loquuntur. Et tunc possumus dicere: Lingua tua manifestum te facit. Tunc possumus dicere quod tales sunt pocius asini Diaboli quam monachi Benedicti.

Syndicate this content:

de asinis indutis pellibus leoninis

laura-gibbs@ou.edu — Sat, 19 Jul 2003 04:22:39 GMT

For notes and a reading quiz, go to aesopica.net.

Syndicate this content: